ក្រសួងវប្បធម៌ បើកការដ្ឋានជួសជុលប្រាសាទបន្ទាយឆ្មារ
កាលពីពេលថ្មីៗនេះ ក្រសួងវប្បធម៌ និងវិចិត្រសិល្បៈ ដឹកនាំដោយឯកឧត្តមហ៊ឹម
ឆែម រដ្ឋមន្រ្តី ក្រសួងវប្បធម៌ បានរៀបចំពិធីក្រុងពាលី ដើម្បីបើកការដ្ឋានជួសជុលផ្នែកបែកបាក់មួយចំនួននៃប្រា សាទបន្ទាយឆ្មារ។
ឯកឧត្តមរដ្ឋមន្រ្តី បានប្រសាសន៍
ក្រោយពីពិធីក្រុងពាលីនេះថា
ឯកឧត្តមពិតជាកោតសរសើរខ្លាំងណាស់ចំពោះការយកចិត្តទុកដាក់របស់ក្រុមបុរាណវិទ្យា
ស្ថាបត្យកម្ម និងវិស្វករសំណង់ របស់ក្រសួង ដែលខិតខំស្រាវជ្រាវប្រមូល
និងជួសជុលប្រាសាទនេះឡើងវិញ។ ការបើកការដ្ឋានជួសជុលផ្នែកខ្លះ នៃប្រាសាទឡើងវិញនេះ
គឺធ្វើឡើងបន្ទាប់ពីក្រុមអ្នកជំនាញមកពីផ្នែក បុរាណវិទ្យា ស្ថាបត្យកម្ម និង
វិស្វកម្ម រកឃើញថា នៅជញ្ជាំងថែវខាងលិច ជ្រុងខាងត្បូងប្រាសាទ មានចម្លាក់
រូបលោកិស្វរៈ ជាព្រះពោធិសាត់ នៃព្រះពុទ្ធសាសនា មហាយានចំនួន ៦ព្រះអង្គ បានបាក់
និងដួលរលំ ដោយសារគ្រោះធម្មជាតិ និង ការលួចគាស់ពីសំណាក់ជនខិលខូចមួយចំនួនលួចគាស់
ដាប់យករូបចម្លាក់នេះ កាលពីទសវត្សរ៍ឆ្នាំ១៩៨០ និង ១៩៩០។
ក្រៅពីចូល រួមពិធីក្រុងពាលី
ឯកឧត្តមរដ្ឋមន្រ្តីក៏បានអញ្ជើញពិនិត្យមើលសកម្មភាពជួសជុលឡើងវិញ នានា នៃប្រាសាទ
ដូចជាថែវខាងកើត ចុងខាងត្បូង និងនៅតួប៉ម ផ្នែកខាងកើត ជ្រុងខាងជើង ដែលចាប់ផ្តើមជួសជុលពីឆ្នាំ២០០៩
មក។
យោងរបាយការណ៍ ដែលទូរទស្សន៍ហង្សមាសHDTVទទួលបាន បានឲ្យដឹងថា មុនការជួសជុល
បង្កាន់ដៃនាគទាំងផ្នែករូបទេវតា និង រូបយក្ស គឺសុទ្ធតែដួលរលំ
កប់ទៅក្នុងគូរទឹកទាំងអស់ តែក្រោយពីការស្រាវជ្រាវ និងកំណាយរបស់ក្រុមអ្នកជំនាញទើបរកឃើញបំណែកថ្មដងខ្លួននាគ
ចម្លាក់យក្ស និងទេវតា យកមកផ្គុំគ្នាឡើងវិញ។ប៉ុន្តែនៅមានចំពោះចម្លាក់ក្បាលយក្ស
និងទេវតា ត្រូវបានបាត់បង់ស្ទើរតែទាំងអស់ ហើយសព្វថ្ងៃដោយសារកង្វះថវិកា គម្រោងនេះ
មិនទាន់បានបញ្ចប់នៅឡើយទេ។
No comments:
Post a Comment