រាជរដ្ឋាភិបាលចំណាយលើគ្រោះមហន្តរាយទឹកជំនន់តិចជាងការកំណត់
អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានប្រកាសថា
រដ្ឋាភិបាលបានចំណាយលើគ្រោះមហន្តរាយទឹកជំនន់តិចជាងការគ្រោងទុក ដោយសារមានវិធានការល្អ
និងកម្រិតទឹកទាបជាងជំនន់ឆ្នាំ២០១១។
មានប្រសាសន៍ក្នុងសន្និសីទ
ស្តីពីការគ្រប់គ្រងគ្រោះមហន្តរាយនៅថ្ងៃទី៣០ខែតុលាឆ្នាំ២០១២ ឯកឧត្តម ញឹម វណ្ណដា អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានអោយដឹងថា
ទឹកជំនន់ឆ្នាំនេះតូច
ប៉ុន្តែយើងបានកំណត់ប្រាក់ ៣០ លានដុល្លារសម្រាប់ទឹកជំនន់ ព្រោះការព្យារណ៍នាពេលកន្លងទៅបានបង្ហាញថា
ឆ្នាំនេះនឹងមានទឹកជំនន់បង្កគ្រោះមហន្តរាយម្តងទៀត តម្រូវអោយរដ្ឋាភិបាល ត្រៀមលុយច្រើនសន្ធឹកសន្ធាប់សម្រាប់ការចំណាយ។
ឯកឧត្តមបានបញ្ជាក់ថា
ថ្វីត្បិតតែរដ្ឋាភិបាលមិនអាចរាយការណ៍ពីចំនួនថវិកាពិតប្រាកដ
ដែលបានចំណាយលើការគ្រប់គ្រងគ្រោះទឹកជំនន់ និងការជួយសង្គ្រោះនោះក៏ដោយ
ប៉ុន្តែប្រាក់នៅសល់សម្តេចអគ្គមហាសេនាបតី ហ៊ុន សែននឹងយកប្រាក់នោះមកប្រើ
ដើម្បីអភិវឌ្ឍវិស័យផ្សេងទៀត។ទាក់ទងការត្រៀមប្រាក់សម្រាប់គ្រោះទឹកជំនន់ច្រើនលើសការចំណាយនេះដែរ
ត្រូវបានអនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបញ្ជាក់ថា
ដោយសារការព្យាករណ៍ថា នឹងមានទឹកជំនន់ធំនៅឆ្នាំ២០១២នេះ ជាហេតុនាំអោយរដ្ឋាភិបាល
កំណត់ថវិកាច្រើនជាងតម្រូវការ។
តាមរបាយការណ៍ទឹកជំនន់ឆ្នាំនេះ
របស់គណៈកម្មាធិការជាតិគ្រប់គ្រងគ្រោះមហន្តរាយ បង្ហាញថា
មនុស្សតែប្រាំនាក់ប៉ុណ្ណោះ បានស្លាប់ ដោយសារទឹកជំនន់
ដោយមិនរាប់បញ្ចូលចំនួនមនុស្សលង់ទឹក ដោយសារស្រវឹងឡើយ។នេះជាចំនួនថយចុះគួរអោយកត់សម្គាល់បើប្រៀបធៀបឆ្នាំ២០១១មានប្រជាជន
២៥០ នាក់ បានស្លាប់ ដោយសារទឹកជំនន់។
ភាពផ្សេងគ្នានៃការលិចលង់ត្រូវបានឯកឧត្តម ញឹម វណ្ណដា បញ្ជាក់ថា
ឆ្នាំនេះ ដីស្រែតែ ១០០ ហិកតាប៉ុណ្ណោះ ក្នុងខេត្តព្រះវិហារ
ខេត្តបន្ទាយមានជ័យ ខេត្តកំពង់ធំ និងខេត្តពោធិ៍សាត់ បានទទួលរងការខូចខាត ចំណែកឆ្នាំមុន ខេត្តចំនួន ១៨ នៃខេត្តទាំង
២៤ ក្នុងប្រទេសកម្ពុជា ទទួលរងគ្រោះទឹកជំនន់។
គួរបញ្ជាក់ថា បញ្ហាបម្រែបម្រួលអាកាសធាតុក្នុងពិភពលោកនាពេលបច្ចុប្បន្ន
បានធ្វើអោយប៉ះពាល់យ៉ាងខ្លាំងលើប្រទេសដែលពឹងផ្អែកវិស័យកសិកម្ម កត្តាទាំងនេះទាមទារអោយប្រជាកសិករតាមដានព័ត៌មានទាក់ទងអាកាសធាតុអោយបាន
ញឹកញាប់ដើម្បីងាយស្រួលក្នុងត្រៀមប្រភេទគ្រាប់ពូជដែលធន់ទ្រាំនឹងអាកាសធាតុនិងតំបន់៕
No comments:
Post a Comment