ពិព័រណ៍អំពីមិត្តប្រាសាទព្រះវិហារ
ការតាំងពិព័រណ៍មិត្តប្រាសាទព្រះវិហារ ដែលប្រព្រឹត្តទៅនៅថ្ងៃទី១៤កក្កដាឆ្នាំ២០១២
នាវិទ្យាស្ថានជាតិបច្ចេកទេសតិចណូ ទទួលបានការគំាទ្រពីមហាជនទាំងក្នុង
និងក្រៅប្រទេសរាប់ពាន់នាក់។ អ្នកគាំទ្រទាំងនេះបានបញ្ចេញទស្សនៈរៀងៗខ្លួនដោយ ការដាក់តាំងនូវរូបថត
ខ្សែវីដេអូ កំណាព្យ ចម្រៀង សម្ភារៈ និងឯកសារផ្សេងៗ ដែលទាក់ទងទៅនឹងប្រាសាទព្រះវិហារ។
ឯកឧត្តម ផៃ ស៊ីផាន
អ្នកនាំពាក្យទីស្តីការគណៈរដ្ឋមន្ត្រី និងជាអ្នកសម្របសម្រួលនៃកម្មវិធីពិព័រណ៍នេះ
មានប្រសាសន៍ថា នៅថ្ងៃទី១នេះ មានអ្នកចូលទស្សនានៅទីកន្លែងផ្ទាល់ចំនួន២ពាន់នាក់
ហើយបើគិតចាប់ពីថ្ងៃជូនដំណឹង រហូតមកដល់ថ្ងៃចាប់ផ្តើមដំបូង មានសាធារណៈជនទាំងក្នុង
និងក្រៅប្រទេសផ្ញើ ឬទំលាក់(Post) រូបថត ឯកសារសោតទស្សន៍ កំណាព្យ ចម្រៀង
ឬសម្ភារៈផ្សេងៗ មកកាន់គេហទំព័រ(Website)របស់គណៈកម្មាធិការ
មិត្តប្រាសាទព្រះវិហារ ប្រមាណជាង៥០០០នាក់។
ឯកឧត្តមបញ្ជាក់ថា
ការរៀបចំនូវពិធីនេះឡើង មិនមាននិន្នាការណាបង្កើតឲ្យមានភាពញុះញង់
ឬអរិភាពទៅដល់បុគ្គល ក្រុម ឬអង្គការណាមួយឡើយ គឺធ្វើឡើងក្នុងគោលបំណងធានាឲ្យប្រាសាទ
ព្រះវិហារ ស្ថិតនៅក្នុងលក្ខណៈធម្មជាតិ និងមានសុវត្ថិភាព ប្រាស់ចាកពីការវាយប្រហារ
ឬបំផ្លាញដោយធម្មជាតិ និងមនុស្ស បន្ទាប់ពីឆ្លងកាត់ នូវបទពិសោធន៍ជាច្រើន
ក្រោយថ្ងៃទី១៥ ខែកក្កដា ឆ្នាំ២០០៨មក។
លោក ពុយ គា
មន្ត្រីឆ្លើយឆ្លងព័ត៌មានរបស់សារព័ត៌មានក្យូដូ( KYODO) របស់ប្រទេសជប៉ុន មានប្រសាសន៍ថា
វេទិកានេះ មានគោលបំណងបើកចំហរ ឲ្យប្រជាពលរដ្ឋ សិស្ស និស្សិត បញ្ញវ័ន្ត និងមន្ត្រីរាជការគ្រប់ស្រទាប់វណ្ណៈស្វែងយល់ឲ្យបានស៊ីជម្រៅអំពីសាវតារបស់ប្រាសាទព្រះវិហារ។ម្យ៉ាងទៀតក៏ចង់បង្ហាញ
ឲ្យសាធារណៈជនជាតិ និងអន្តរជាតិ យល់ច្បាស់ពីប្រវត្តិនៃជម្លោះ
តំបន់ប្រាសាទព្រះវិហាររវាងកម្ពុជា និងថៃ។
សូមបញ្ជាក់ថា ការដែលរៀបចំឲ្យមានពិធីពេលនេះ វាគឺជារដូវវប្បធម៌អន្តរជាតិ
ដែលពិភពលោក បានរៀបចំវេទិកាជជែកគ្នាអំពីបេតិកភណ្ឌពិភពលោកនៅប្រទេសរុស្ស៊ីហើយសម្រាប់កម្ពុជាក៏បានយកខែកក្កដាជារដូវនៃបេតិកភណ្ឌជាតិនិងបេតិកភណ្ឌពិភពលោកក្នុងដំណាក់កាលដែលខ្លួនធ្លាប់បានដាក់
បញ្ចូល ប្រាសាទអង្គរវត្តជាបេតិកភណ្ឌពិភពលោកបន្ទាប់មកក៏បានដាក់បញ្ចូលឧទ្យានវប្បធម៌ប្រាសាទព្រះវិហារ
និងចុងក្រោយនេះក៏កំពុងតែទាមទារយករូបសំណាកដែលត្រូវគេលួចពីកម្ពុជា
យកទៅធ្វើការដាក់ដេញថ្លៃនៅ ទីក្រុងញូយក ប្រគល់ឲ្យកម្ពុជាវិញ។
គួររំលឹកថា ជម្លោះព្រំដែនរវាងកម្ពុជា និងថៃ
គឺបានកើតឡើងដោយសារក្រុមទាហានឈ្លានពានថៃ
ចូលមកលុកលុយនៅតំបន់ប្រាសាទព្រះវិហារនៅថ្ងៃទី១៥ ខែកក្កដា ឆ្នាំ២០០៨ បន្ទាប់ពីប្រាសាទព្រះវិហារ
ត្រូវបានអង្គការយូណេស្កូ ទទួលស្គាល់ជាសម្បត្តិខែ្មរស្របច្បាប់
និងជាសម្បត្តិបេតិកភណ្ឌពិភពលោក នៅទីក្រុងកេបិក ប្រទេសកាណាដា នាថ្ងៃទី០៧ កក្កដា
ឆ្នាំ២០០៨។
No comments:
Post a Comment